Endlich wieder ein 1. Platz
Auf der neia Stockbahn in Untergrasensee (nei verlegtes Pflaster) hat die Nöhamer Mannschaft mit am Stopfinger Willi als Moa, an Schmied Sigi und an Januschka Alois als Stockschützen und mia an Bachmeier Horst als Hintauffe wieder a Moi an 1. Platz einfahren kinna.
Zur neia Stockbahn kann ma de Untergrasenseer meiner Meinung nach beglückwünschen. Sie geht überoi grod hi, is net zu unruhig und geht vernünftig streng, was mia guat passt.
Zum Mastn iss je nach Auflag net zu ungleich und beim Stockschiassn muas ma a net glei Angst hom, dass ma aussteigt. Trotzdem über an guadn Teer geht einfach nix. In da Vorrundn ham ma olle 6 Spiele gwinna kinna.
Des oanzege Spiel des wo knapp war, war gega Triftern. Nach 3 Kehrn ham ma zwar 3 Mal Nachschuss ghabt, aber Triftern war 9:0 vorn. Des ham ma dann mit am 9er ausgleicha kinna. Letztendlich ham mia dann aber mit 14:12 gwunna.
Da war natürlich da Grundstein scho glegt.
In de andan Spiele in da Vorrundn ham ma oiwai über 20 Punkte gmacht und alle deitlich gwunna. Allerdings hats in da Rückrunden glei zwoa Niederlagen gega Lengsham und gega Triftern gsetzt. Gega Lengsham ham ma in da 1. Kehre glei an 5er gschrimm und dann nimma. Und gega Triftern war ma nach 3 Kehrn 13:0 vorn und mia hams net Hoam bringa kinna. Des ham ma a bissal zleicht gnumma.
Insgesammt hats aber scho passt. Da Willi is koa oanzigs moi da hungert. Da Alois hat an überragenden 2. Stockschützen gschossn. Da Sigi war wie immer guat und I hab des zambrocht, was zum 1. Platz notwendig war.
Aufgschrim vom Horst
