Des zwoate Turnier, da zwoate Sieg und ein gelungena Einstand vom Sigi.
Um’s gleich vorweg zum nehma. Nach da Kaiserkannen bedingten Turnierpause konnt ma fürn SSV Nöham im zwoatn Sommerturnierstart vo dem Jahr den zwoatn Turniersieg eifahren. De Helden waren desmal zum Einstand der Dickl Sigi, der Grabmeier, der erste Nothelfer der Gisnapp (ois Ersatz für'n Stütz Luggi) und ih, der Bachmeier Horst.
Wir vier ham ma mit den andern Mannschaften aus Julbach, Gumpersdorf, Wittibreut, Prienbach, Zeilarn und Neukirchen in da niegel-nagel-neuen Halle in Zimmern das erste und somit Einweihungsturnier bestreiten derfa. Ma muss de Zimmerer a Kompliment für die wunderschöne Halle macha. Des ist wirklich a Schmuckstück. Sauba Mona. ?
Man woaß zwar immer ned genau, welche Schützen für an Verein startn, aber nachdem ma im Vorfeld de Startlistn gsehn hatten, ham ma uns schon einiges ausgerechnet. Unsa Aufstellung war ja ned unbedingt schlecht.
Nach zaage Siege über Gumpersdorf und Zeilarn konntn ma auch Prienbach (mit einer Dame besetzt) schlong und mit drei Siegen zur verdienten ersten Suppn. Nach dem Aussetzer konnt ma Julbach niederringa, Neukirchen mit Glück und Beistand aus Neukirchen besiegn und Wittibreut (sogoa mit zwoa Damen) weghau. A wunderschöne Vorrundn mit 6 Siege, wo ma 3 Mal des Spui selber nimmer im Griff hattn und uns jedsmoi de Andern in da letztn Kehr an Vortritt lassn ham.
De Rückrundn is dann glei mit an a saubern Niederlage gega Gumpersdorf oh ganga. No ja, Zeilarn und Prienbach ham uns dann wieda koiffa. So dass ma zo da zwoatn Suppn erst oa Niederlage hattn. Wie gehabt ham ma noch dem zwoatn Aussetza Julbach grodgord schlong kinna.
Der absolute Hit is aber dann des vorletzte Spui gega Neukirchen gwen. I sog nur Not gega Elend. Des Spui muas ma se auf da Zunga zergeh lassn.
Neukirchen schiaßt oh und schreibt an Neina. Mia schiaß ma oh und schreim an Simma. Dritte Kehr Anschuß und 5 Punkte für Neukirchen. Vierte Kehr umdraht für uns. In da Fünften Kehr, wia kohs andas sei, Neukirchen Anschuß und 3 Punkte. Des hoast mia ham in da letztn Kehr Anschuß und 5 Punkte Rückstand. Sechst Kehr, da Stockschütz vo Neukirchen feit. Da zwoate vo Neukirchen und ih treffan, so dass ih 1½ Metta schreg vor da Daubn steh. Neukirchen möchte masten und gibt aber mein Stock a bisserl auf. Da letzte Neukirchner verschießt eanan Stock no, so dass ma hint auffe mit Leichtigkeit an Simma zum Sieg schreim konntn. A so a Glück. ?
S letzte Spui ham ma dann gega Wittibreut no sauba verlorn. Worauf a Wittibreuter zu mia gsogt hat: „Er kann scho gar nimma so weit zruck denga, wann se s’letzte Mal gege Nöham gwunga ham.“ Na ja, in kleinen Dingen san ma großzügig.
Auf alle Fälle ham ma des Turnier mit souveränen 20:4 Punkten und der „überragenden“ besten Stocknotn vo 1,28 gwunna. Zwoata is Julbach mit 15:9 und da zwaot schlechtan Noten vo 0.95 worn.
Dees moan ih, sogt scho vui.
