Platz 1 für Johannes und Thomas Kronschnabl, sowie Horst und Stütz Luggi!
Die Superwoche setzt sich fort. Nach 2 ersten und einem zweiten Platz schaffte die Mischung aus Jung und Alt in Wilhelmshöhe erneut den Sprung auf den ersten Platz!
"Ih daad song, DES kann se säng lossn!!" :-)))
"Amoi schaung, wias am Samstag in Münschdorf wwar!"
zum Bericht vom Horst...
Wilhelmshöhe: Net meara ois Not duat fürn Erstn
Nach dem da DickSi kurzfristig obsong hot miassn, hob ih (da Horst) eispringa deaffa und bi vom Stütz Lugge und de zwoa Kronschanbl Buam as Turnier noch Wilhelmshee mitgnumma worn. Beim Warmschiassn ham mas scho gmerkt, dass net so zag geht wia mia eigentlich gmoand hamd.
Da Lugge und ich warn ma uns schnell einig, dass ma de Junga vorn hi lossn. So hot de Johannes ois Moa angfangt und da Thomas vorn auffe gschossn.
Beim Ausgem vom Spiagl ham ma glei a wenig bled gschaut. Es is nämlich zerst da Rückrundnspiegl mit’m umdrahdn Anschuss ausgem worn. Nach dem da erste Anschuss klärt war, hot uns Reisbach bei unsam Anschuss a da ersten Kehr glei an 7 gschenkt. Da mia oba no net wirklich troffa hamd, ham ma grod na oa moi gschrimm und des Spiel seiba verlorn. I hab da oba trotzdem scho vermutet, dass des net da Gegna um an vordarn Platz war und sog zum Johannes no: „Gega oan vo de Hintan kannst da amoi an Ausrutscha leistn, wichtig is gega de Konkurenten um de vordan Platz. Gege Koiba ham mas bessa gmacht und gwunna. Nach dem Aussetza war Oberhausen koa Gegna, hoasst 2 Punkte. Johanniskircha hot uns dann zum Unentschiedn zwunga. De Kreisauswahl 108 war stark, oba mia warn stärker. Wieda 2 Punkte. S letzte vo da Vorrundn gega Neimarkt hot na amoi a Unentschiedn brocht.
De Rückrundn is mit umdrahde Vorzeichen oganga. Sieg gega Reisbach, verlorn gega Koiba. Noch’m Aussetza und dem zwatn Sieg gega Oberhausen is de Kronschnabl Buam eigfoin, see kanntn tauschn. Prompt ham ma noch zwoa Kehrn gega Johanniskircha 10:0 hintn. Da sogt da Johannes zu mia: „Via Dreia glangand no.“ De ham ma dann a gmocht bzw. es warn a Fünfa dabei. Gega d’108er war dann unsa bests Spiel. Bis zum Schluss is mit’m Schreim hin und her ganga mit dem bessan End für uns. Mia ham zwischen drin amoi an Fünfa eine brocht. S letzte gega Neimarkt ham ma dann no vergeigt.
Weil oba de Gruppn hübsch ausglicha war, ham uns de 16:8 Punkte zum Gwinga glangt. Bis zum 5. Platz oba hots mit Johanniskircha, Neimarkt, d‘108er, und Koiba dann jeweils um oan Punkt g’feid. Reisbach zwoa da hinta und Oberhausen is a weng obgfoin.
So ham ma zwar wieda wos für Gfriadruga mitbrocht, oba de vier Wammerl sand net unbedingt an erstn Platz würdig.
Na ja, gschossn ham ma net schlecht und vor allem ausglicha. Es hot a jeda seine Feischuss dabei g’habt noch dem Motto: „Net meara ois Not duat zum Erstn“.
