"Gaaaannz langsam gehts wieda - oda a ned!?"
"a kloane Wortspielerei am Anfang..."
"Dasöimt, ois ih no a Kind war, hods in da Voiksschui a Spui gem, des hod ghoassn: wer kennt des längste Wort?"
"Des längste Wort des's damois gem hod und des mia Bum und Mädln kennt hamd, war des zeitgemäße Donaudampfschiffahrtskapitänsmütze!
Sagenhafte 34 Buchstaben war des Wort lang und a jäda von uns war stoiz, wenn er des ohne "Haspler" song hod kinna!
Donaudampfschiffe gibts mittlerweile nimma und de Wortlänge is ebenfalls "getoppt" wordn!
Nämlich durch die zungenbrecherische Infektionsschutzmaßnahmenverordnung! :-))
DES Wort hod 35 Buchstaben! Traurig oba wahr!!
Und ah wenn ma unsere geliebte Donaudampfschiffahrtskapitänsmütze noch da neia Rechtschreibung schreibn daad - nämlich ..."Schifffahrt.." mit drei "Fenster-f", häd des Kappe de Nosn ned vor da Infektionsschutzmaßnahmenverordnung, sondern waar allenfalls gleichlang!
Iatz werd si der Oane oder Andere frogn: "wos hod des mim Stockschiaßn z'doan?"
Nun, während de Donaudampfschiffahrtskapitänsmütze damit rein gar nix z'doan hod, is de
Infektionsschutzmaßnahmenverordnung in der mittlerweile 6. Bayerischen Auflage daran schuid, daaß mia unsern geliebten Sport momentan nur eingeschränkt ausübn kinnand!
Nach den zaghaften Lockerungen der letztn Wochen kimma zwar wieda trainiern - unter Einhaltung der Hygieneregeln selbstverständlich! ;-) - die da grob umschlossn lauten: Maske Beim Betreten und Verlassen des Sportgeländes (und beim Soacha), Abstand mindestens genau 1500mm, Hände waschn und desinfizieren!"
Reißn soids de ned, wos unsere Schnupfer hard trifft und wenn doch, dann bittscheen in d'Armbeuge!
Pfüad di God, do werd s'Vereinsgwand ausschau...! :-))
Oba wos is mid Turniere?
Im Freien könntma scho wieda oans hoitn!
In da Halle schauts ned so guad aus, zwecks da Belüftung und de Aerosole - wia mia glernt ham! ;-)
De Wintersaison is zwar in Planung, oba obs dann stattfindt?
Koana woaß sicher! Ned amoi da Söder!
Hoffma daaß' d'Regierung zualossn ka und mia in absehbarer Zeit wieda an einigermaßn gregeltn Schiaßbetrieb hom wernd!!
Rückblickend kimma äh froh sei, dass mid dem ganzn Coronazeigs, in unserem Verein koane größere Schäden in Form von Erkrankungen, bzw. - schlimmer noch - Todesfälle gebn hod!
"Mia kinnan uns mittlerweile sogar wieda a wengal zammsitzn" und über Sinn und Unsinn der "Söderischen" Vorschriften diskutieren! Weil - Fuaßboi is koana mehr und sonst gibts a koane sportlichn Aufreger de's Wert warn daaß man drüber redt!
Manchmoi taucht no de zögerliche Frage auf wann's denn des nexte Stockturnier gem werd?
Oba außa am Schulterzuckn mit runterglassne Mundwinkl hod do koana am Stammtisch a erleuchtende Eingebung!
Mia wern säng...
